تارت بالحامض و اللوز رآآآآآآائعة جدا

السلام عليكم و رحمة الله
نتمنى من الله تكونو جميع فاحسن الاحوال 
وصفة اليوم ان شاء الله هي تارت بالحامض و اللوز كتجي لديدة بزآآآآف و رآآآآآئعة جدا نتمنى من الله انها تعجبكم

على بركة الله سنحتاج
سابلي باللوز
كريم اللوز و قشور الحامض
كريم الحامض
ابيض البيض




سابلي باللوز
150 غ زبدة فحرارة المطبخ
50 غ سكر ڭلاصي
75 غ لوز مطحون ( صلقتو و نشفتو ثم طحنتو )
قشرة حامضة
175 غ دقيق او اكتر على حسب نوع الدقيق المستعمل
بيضة واحدة





كريم اللوز و قشور الحامض
50 غرام زبدة فحرارة المطبخ
50 غرام زبدة
قشرة 2 حامضات
بيضة واحدة




كريم الحامض
240 مل عصير حامض
قشرة 4 حامضات
120 غ سكر ( او 150 غ لمحبي الحلاوة )
اصفر 4 بيضات و نحتفظ بابيض البيض
2 بيضات كاملات
30 غرام مايزينا ( نشا )
50 غ لوز مطحون ( مصلوق و ناشف و مطحون )
150 غ زبدة فحرارة المطبخ

على بركة الله نبداو بالسابلي

نطربو الزبدة و السكر حتى تتجانس لينا العناصر
نضيفو اللوز و قشور الحامض

ضيفو البيض و نطربو مرة اخرى

نضيفو الدقيق بشوية بشوية 
العجينة خاصها تكون مرخوفة

 نلوي العجين فبلاستيك و ندخلو للتلاجة ساعة


نمرو لتحضير كريم اللوز

نسخنو افرن على 180 درجة مئوية 350 فهرنهايت

نطربو الزبدة و السكر حتى تتجانس لينا العناصر

نضيفو قشور الحامض و اللوز

ثم نضيفو البيض و نطربو مزيان

نخرجو العجين من التلاجة و نسرحوه فلمقلة ديلنا من الافضل تعملو طبقة رقيقة انا هنا عملت مقلة 24 سم تبقا لي من العجين

عملت عليها الكريم ديال اللوز و دخلتو لفرن لمدة 30 دقيقة و خاصنا نشوه مرة مرة باش ماتحرقش لينا الكريم 

نمرو لتحضير كريم الحامض
نعملو الحامض يغلي

نطربو اصفر البيض و البيض الكامل مع السكر

نضيفو قشور الحامض و النشا

نخلطو

نضيفو الحامض الغليان

نخلطو مزيان 

نعملو الخليط على نار مهيلة و نستمرو فالتحراك حتى يبدا الخليط يتقال

نزولو من على العافية و نخليه يبرد شوية

 ثم اضيف الزبدة مع التحراك شيئا فشيئا

اضيف اللوز و الفاني

ندخلها للتلاجة تبرد

ندخلها للتلاجة تبرد لمدة 4 ساعات

زولتها من الاطار

عملت الميرنغ الايطالي كما فهاد الرابط و حرقتو بالتورش او ممكن دخلوها للفران لمدة 5 دقايق 
ولكن فهاد الحالة ماتزولوش الاطار

ها هي منين وجدات 
طعم رآآآآآائع جدا
نتمنى من الله انها تعجبكم و ماتنساونيش من صالح دعائكم و في امان الله