السلام عليكم و رحمة الله
نتمنى من الله تكونو جميع فاحسن الاحوال
كيف ماكنت واعدتكم هادي مدة طويلة باش نزل وصفة اجنواز المعتمدة عندي لتحضير حلويات الاعراس و المناسبات
الميزة ديال هاد الجنواز انها كتكون متماسكة نسبيا و فنفس الوقت رطبة و ماكتحتاجش للسقي بالسيرو
ان شاء الله تعجبكم
على بركة الله سنحتاج ل
100 غ دقيق مغربل
40 غ نشا او مايزينا مغربلة
70 غ زبدة دايبة و باردة
ڤانيلا + قشور حامضة
5 بيضات فحرارة المطبخ
2 اصفر بيض فحرارة المطبخ
130 غ سكر
نشعلو الفرن على 350 درجة فهرنهايت اي 180 مئوية
على بركة الله دوبت الزبدة من قبل و خليتها على جنب
غربلت الدقيق و النشا و خليتهم على جنب
نعمل البيض كامل مع اصفر البيض و السكر و نطرب
نطربو حتى يضاعف الحجم 3 مرات و اللون كيميل للاصفر باهت
كنضيفو الدقيق و النشا قليلا قليلا و حنا كنطربو
هنا منين كملت الدقيق و النشا
بديت كنضيف الزبدة لي دوبت و خليتها تبرد
ضفتها على شكل قطرات هاد النقطة مهمة جدا حيت اذا ضفناها كلها مرة وحدة الكيك غادي تنزل وماغاديش تطلع
نستمر فاضافة الزبدة على شكل قطرات حتى نضيفها كلها
نعمل الخليط فقالب الكيك 22 سم
و دخلتو للفرن مابين 35 حتى ل 40 دقيقة
خرجتو من الفرن و خليتو تقريبا 10 دقائق ثم قلبتو باش يبرد
خرجتو من الفرن و خليتو تقريبا 10 دقائق ثم قلبتو باش يبرد
هنا عمرتو بموس شوكولا بدون بيض
و كريم بالحامض سريع التحضير
نتمنى من الله انكم تكونو ستفدتو من هاد الطريقة ديال الجنواز و لي كتختلف كليا على الجنواز التقليدية لي سبق و نزلت
نتمنى نشوف تعليقاتكم و في امان الله
نتمنى نشوف تعليقاتكم و في امان الله
ليست هناك تعليقات:
إرسال تعليق