الثلاثاء، 3 سبتمبر، 2013

خبيز مقطن و خفيف و لديد امممم


 السلام عليكم و رحمة الله
نتمنى من الله تكونو جميع فاحسن الاحوال و تقبل الله منا و منكم صالح الاعمال يا ربي امين
هاد الخبز ديال التوست كيجي غزآآآآآآآال و مفشش و خفيف بزآآآآآاف بحالو بحال هاد الخبيزات لي كنت عملت من قبل فهاد الرابط
مع اختلاف بسيط فالمقادير و كذلك العجين فالمرة الاولى خلطت مقادير العجين الاول و خليتو تقريبا 12 ساعة عاد باش عملت لخبيزات ولكن هنا لعجين الاول عملتو يغلي على نار مهيلة حتى تقال و كدلك ماخليتوش بات فالتلاجة 12 ساعة خليتو برد فحرارة المطبخ و ستعملتو داك الساعة حيت منين سالت و بحت لقيت ان ماشي بالضرورة يبقى 12 ساعة*
المهم بلا تطوال نمرو للمقادير*
على بركة الله سنحتاج ل




الخليط الاول
50 غ دقيق ديال الخبز
250 مل ماء
الخليط التاني
540 غ دقيق لي كنعجنو به الخبز
80 غ سكر
قليل من الملح
2 معالق كبار حليب غبرة
12 غ خميرة
بيضة
60 غ كريم سائل تقريبا ربع كاس ديال العنبة
60 غ حليب تقريبا نص كاس ديال العنبة
50 غ زبدة دايبة





ناخد مقادير الخليط الاول و نعملهم على نار مهيلة و نبدا نخلط حتى نحصل على خليط تقيل بحال هكا
نخليه يبرد فحرارة المطبخ

 نعمل الخميرة فقليل من الما دافي و نخليها على جنب حتى تطلق


 نبدا نعجن جميع المقادير باستثناء الزبدة
 نضيفو الدقيق و نعجنو

 لعجين كيكون رخو و كيكون ملصق


 نضيفو الزبدة دايبة

 هنا بغيت نوريكم لعجين كيفاش كيكون

 غطيتو خليتو يخمر

 رشيت المكان لي غادي نعجن فيه بشوية ديال الدقيق
 لعجين كيكون خفيف و بحكم الزبدة لي ضفنا فالاخير كتساعد باش يتكور بسرعة






 نطلق كل كرة و نشكلها بحال لي فالصور

 ثم نعملها فالمقلة ديال خبز لتوست

 طبعا نخليه يخمر فحرارة المطبخ و ندهنو بالبيض و ندخلو لفرن ساخن على درجة حرارة 350 فهرنهايت 180 درجة مئوية ما بين 30 حتى ل 35 دقيقة او حتى يتحمر مزيان







ها هو منين وجد مانقولكمش شحال كيجي خفيف و بنين و لديد و زوين 
نتمنى من الله ان لوصفة تعجبكم و تقبل الله منا و منكم صالح الاعمال يا ربي امين

ليست هناك تعليقات:

إرسال تعليق