krispy kreme دوناتس

 

السلام عليكم و رحمة الله

نتمنى من الله تكونو جيمع فاحسن الاحوال يا ربي امين

هاد الدوناتس هما ديال محل مشهور هنا في امريكا و انا كيعجبوني الدوناتس و كذلك عندي بنتي هداية كتحماق عليهم و ماكنبغيش نشريهم من على برا

و دائما كنقلب فالانترنيت اذا لقيت الوصفة ديالهم

حتى لقيت هاد الطريقة فجربتها جات لديدة بزآآآآآآآف و مايتشبعش منها

المرجو احترام المقادير و الطريقة باش يخرجو منفوخين كما فالصور و كذلك بحال الدوناتس 

على بركة الله سنحتاج ل

21 ع خميرة 

120 مل دافي

530 مل حليب سخون ثم نخليوه يبرد فحرارة المطبخ

100 غ سكر

قليل من الملح

3 بيضات

113 غ زبدة من الافضل نباتية او كريسكو بالنسبة للناس المقيمين فامريكا

انا عملت فقط الزبدة العادية

940 غ دقيق

زيت للقلي

الناپاج

113 غ زبدة

200 حتى ل 375 سكر ڭلاصي انا عملت 200 غ فقط

قليل من الڤانيلا

مابين 90 حتى ل 150 مل حليب مركز بدون سكر

2 معالق شوكولا بيضاء اختياري

اذن على بركة الله نعملو الحليب يسخن ثم نخيلوه يبرد فحرارة المطبخ

 نخلطو 375 غ دقيق الملح السكر الخميرة البيض و الزبدة الحليب و الفاني

انا هنا نسيت ماضفت البيض فالاول

نخلطو تقريبا 1 دقيقة ثم نرفعو من السرعة شوية و نخلطو *تقريبا 2 دقايق اخرين

نضيفو الدقيق المتبقي بشوية بشوية

ثم نخلطو مزيان

العجين خاصو يكون مرخوف كما في الصور

لاحظو لعجين كيف لصق لي فيدي*

نغطيه و نخليه يخمر فحرارة المطبخ انا كان الصهد بزآآآآآف خدا معايا تقريبا 30 دقيقة

هنا منين خمر و ضاعف الحجم ديالو تقريبا 3 ديال المرات

رشيت المكان لي غادي نخدم فيه بالدقيق و سرحت العجين و قطعتو بحال الشكل لي كتشوفو و خليتو يخمر مرة اخرى

منين خمر سخنت قليتو فزيت ساخن تقريبا 30 تانية او 1 دقيقة على كل وجه*

خليتهم ينشفو و بديت كنحضر الڭلاصاج*

للاشارة ممكن تحضرو اڭلاصاج منين يبداو يخمرو و تخليوه حتى تحتاجو

بالنسبة للناپاج انا هنا طحنت قليل من الفريز و دوبت قليل من الشوكولا باش نوع فالنكهات

دوبت الزبدة و ضفت عليها قليل من السكر ڭلاصي الفاني

تم ضفت عليها حليب مركز بدون سكر و بديت كنضيف السكر ڭلاصي بشوية بشوية باش نحصل على الكتافة لي انا محتاجة و دائما على نار مهيلة جدا

تم اخير ضفت الشكولا بيضاء و زولتو من على العافية*

للاشارة الوصفة الصلية مافيهاش الشوكولا بيضاء

طحنت الفريز و صفيتو ي ضفت عليه القليل من الڭلاصاج و كدلك الامر بالنسبة للشوكولا دوبتها و ضفت عليها القليل من الڭلاصاج و كذلك ضفت عليها 1 صغيرة من شوكولا سوداء غبرة بدون سكر

هنا بالشوكولا

هنا خليتهم بالفاني

و هنا بالفريز

ها هما منين وجدو جاو لدآآآآد بزآآآآآآآآآآآاف ومايتشبعشي منهم

نتمنى من الله انهم يعجبوكم و في امان الله و حفظه

تقبل الله منا و منكم صالح الاعمال