Piece Montee للخطوبة خطوة خطوة مرحبا بالجميع

 السلام عليكم و رحمة الله

نتمنى من الله تكونو جميع فاحسن الاحوال يا ربي امين

الكيك ديال اليوم ان شاء الله هي  للخطوبة نتمنى من الله اناه تعجبكم و نفيدكم و لو بقليل

بالنسبة لهاد الكيك انا خدمتها بعجين السكر 

هاد العجين اولمرة نخدم به و هو كيجي زوين بزآآآآآف هو بالمارشميلو سبق و نزلت عجين سكر بالمارشميلو ولكن هدا احسن منو على مراحل و لخدمة به ساهلة و زوينة

انشاء الله نزلو قريب

على بركة الله سنحتاج ل

كيك

عجين السكر

http://ghizlanesweets.blogspot.com/2013/03/blog-post_5.html

http://ghizlanesweets.blogspot.com/2012/01/pastillage.html

كرتون للبيض

الورد عملتوبخليط من عجين السكر الخاص بالورد فهاد الرابط و عجين السكر بالمارشميلو

http://ghizlanesweets.blogspot.com/2013/08/blog-post_31.html

http://ghizlanesweets.blogspot.com/2013/03/blog-post_5.html

قليل من عجنين السكر فقليل من الماء

على بركة الله نبداو بالوردة

خديت كميات متساوية من عجين السكر الخاص بالورد و عجين المارشميلو و خدمتهم مزيان 

هاد العملية ماكتخليش لعجين يتهرس بسهولة و فنفس الوقت كينشف بسرعة

طلقت عجين السكر

كناخد معلقة و نرشم بها لعجين و نقطعو كيما كتشوفو

مهم جدا اننا نحتفظو بالاوراق لمقطعة فپلاستيك باش ماينشفوش

 انا هنا كنت محتاجة نعمل وردة كبيرة و اوراق ورد غادي نزلهم فوق من الكيك 

الاوراق لي غادي نزلهم فوق من الكيك طلقتهم و ضغطت عليهم من الجناب كيما كتشوفو و عطيتهم هاد الشكل و خليتهم ينشفو فكارطون  ديال البيض

 بالنسبة للوردة على بركة الله كنشكل حبة اجاص كما فالصورة 

 كنضغط عليها فالجناب و بسرعة كنعمل فيها نقطة من الماء و السكر لي طلقنا من قبل و نلصقها فالاجاصة

 بسرعة كنكمل جميع الاوراق لي عندي حتاجيت هنا 10 ديال الاوراق

 عملت الوردة فالكارتون و خليتها تنشف

 دهنت الجناب باللون الدهبي من مورا مانشفت الوردة و خليتو ينشف

ثم دهنتها كلها باللون العقيقي كيلمع 

 هنا خديت قليل من حبيبات الفرشي

دهنت الاجاصة بقليل من خليط الماء و السكر

و لصقت عليها حبيبات الفرشي

و خليت وردة تنشف على راحتها

 بالسبة للكيك عملت كيك بالشكلاط كيجي رآآآآآئع ان شاء الله نزل الوصفة فموضوع مستقل

هنا قطعت الكيك على 4 و سقيتو و عمرتو ب كريم پاتسيير مع الپرالين و كريم شونتي

 دهنت الكيك كلها ب كريم الزبدة و دخلتها للتلاجة تبرد

 طلقت عجين السكر و عاودت فوق منو بهاد المدلك فيه رشم القلب

 غطيت الكيك و حاولت نقاد الجناب 

 زولت كل الجناب لي زايدين

 طبعا خديت قياس الاعواد باش نزل الكيك التاني كنت شرحت هاد العملية فالعديد من الوصفات السابقة

 بالنسبة للخواتم عملتها كيما كتشوفو فالصورة و دهنتهم بالدهبي و الفضي

ها هي الكيك منين وجدات نتمنى من الله انها تعجبكم

عملت كرات صغار فالجناب و نزلت الخواتم فوق القلب الصغير و عملت الوردة 

نتمنى من الله نكون فدتكم و في امان الله